বইদ্যর পইদ্য

প্রকাশিত: ৭:০৬ অপরাহ্ণ, এপ্রিল ৭, ২০২০

বইদ্যর পইদ্য

বিনেন্দু ভৌমিক

কেউ কইরা ‘বইছ না বেটা’, ‘চেম্বারো দে তালা’,
‘অসুখ অইলে মরি যাইবে, উঙ্গা হালার হালা’।
‘নিজর বালা বুঝোছ না নি, এ হালা পয়মাল?’
‘চাইয়া কিচ্ছু দেখোছ না নি, দেশোর কিতা হাল?’
কেউ কইরা- ‘যাইবো না নি, টেকার যে তার লোভ!
কেউ বা আবার মুখ টিফিয়া কররা যে ‘বিদ্রূফ’।
কেউ কেউ কেউ বালাও কইরা, কইরা ‘রিয়েল হিরো’,
‘মানবতার সেবক’ আফনে, আর হকলৌ ‘জিরো’!
ভাইবন্দু, আরি-ফরি, বউদি ও বড়দিরা—
অতা করো, হতা করো, পরামর্শ দিরা।
এক রোগীরে দেখার পরেউ ফালাই দিবায় গ্লাভস,
হাত ধইবায় ঘন ঘন, মুখো লাগাও মাস্ক।
কেউ কইরা প্রইত্যেকবার রোগী দেখার পরে,
ওষুধ মারইন রোগীর সিটো, বুঝইন তো ডর করে।
কেউ কইরা যে-ড্রেস পিনছো, পথওউ পাইতো নায়,
উল্টা ডরে ভাগি যাইবো, দুষ্টা করোনায়।
হক্লোর কথা হুনরাম আমি, হুনরাম সবর ‘গাইল’,
দিশবিশ তো পাইরামৌ না, দিরাম তবু ‘স্মাইল’।
ই স্মাইলটা বেয়াক্কলোর, ই স্মাইলটা শ্যামোর,
ই স্মাইলটা বেবুথা এক দিলখোলা দেশপ্রেমোর।
অতএব সব আইয়োউক্কা, হকলরে কইয়ার,
আফনারারৌ লাগি আমি চেম্বারো যাইয়ার।

ছড়িয়ে দিন